གཏན་འདུན།

ལྷག་མཐོང་བྱང་པའི་ཤེས་བཞིན་དང་།

སྟོང་ཉིད་རྟོགས་པའི་ཤེས་རབ་ལ།

སྙེག་པའི་གཏན་འདུན་ལོས་ཡོད་དེ།

བདག་བློ་རྨོངས་པའི་དུག་ཅན་ལ།

སྐལ་ལྡན་སྙུགས་རུས་མི་འདེང་དེ།

ཕར་རོལ་བགྲོད་པ་དེ་བས་དཀའ།

ལན་གཅིག་གནས་འདིར་སྡོད་པར་ཐལ།

རྣམ་ཤེས།

ཁ་བའི་འདབས་མ་ལས་འབྱུང་བའི་ངའི་རྣམ་ཤེས།

ལོ་ཟླའི་འཕེལ་སྒྲིབ་ཀྱི་འཇིག་མི་ནུས་ལ།

ཆར་དང་སེར་བས་དེ་བས་ཀྱང་

རྩ་བརླག་གཏོང་མི་ཐུབ།

རྩ་བ་གངས་དང་ཐུགས་ཤིང་

རྩེ་མོ་རི་རྒྱལ་ཏེ་སེར་བཅོལ་ཡོད་ལ།

ཡར་ཀླུང་གཙང་པོའི་ཆུ་སྒྲ་དེ་ཐོས་ཞོར།

རྩིད་ཐང་གཞུང་གི་གཏམ་རྒྱུད་དེ་ཉན་མྱོངས།
ལ་རྒྱ་མི་དོར་ལ་དམ་ཚིག་ནི་དེ་བས་ཀྱང་ངོ།
༧ཀུན་གཟིགས་མཆོག་གི་གདམས་ངག་དེ་
ངའི་ཆེས་བླ་མེད་ཀྱི་དམ་ཆ་དེ་ཡིན།།

འདོད་རྟ།

འདོད་པའི་རྟ་ལ་བཞོན་ཏེ།

ཐག་རིང་ཕྱོགས་ལ་བསྐྱོད་བསམ།
ཐག་རིང་རྒྱང་བའི་ལམ་དེ།
ཕྱོགས་བཞིན་བཙན་རུ་བཙན་རུ།
ཐག་རིང་གནས་མཆོག་དེ་ནི།
རྟོགས་བཟོས་དཀྱེལ་འཁོར་ཨེ་ཡིན།
སྨྲ་མེད་ནམ་མཁའི་སྐར་མས།
ལུང་བསྟན་ང་ལ་གནང་རོགས།

ངའི་འཇིག་རྟེན་ཆུང་ངུ་།

སྒྱུ་རྩལ་གྱི་དོ་ར་ནི་ངའི་འཇིན་རྟེན་ཆུང་ངུ་དེ་ཡིན་ལ།

ངས་བསམ་གཞིགས་དང་སྡུག་བསྔལ་བཤད་ས་དེ་ཡང་ཡིན།

བསམ་པའི་འཆར་སྣང་དང་རྟོག་བཟོས་ཀྱི་སྐད་ཆ།
རང་རློམ་གྱི་སྨྲ་བ་དང་ཆགས་སྡང་གི་ངར་ཤུགས།
བརྩེ་དུང་གི་འདོད་རྔམ་དང་བརྩེ་དུང་གི་དམ་ཆ།
ངས་ཁྱེད་ལ་དུས་དང་བསམ་པའི་གནས་སྟངས་མི་འདྲ་བའི་སྐབས
འཚོར་བ་རྣམས་གསང་མེད་དུ་བརྗོད་མུད་ལས།

ཁྱེད་ནི་ང་ལ་དུས་རྟག་ཏུ་སེམས་གསོ་བྱ་བཞིན།

ཁྱེད་ནི་ཆ་རྐྱཻན་མི་འདོན་པའི།

གྲོགས་པོ་བློས་ཐུབ་དེ་ཁོ་ན་ཡིན་ངེས།

 

ཕུན་ཚོགས་ཚེ་རིང་གི་འགྲུལ་བཞུད།

ཕུན་ཚོགས་ཚེ་རིང་གི་འགྲུལ་བཞུད།

ལྗང་བུས།

༡
སྦྲག་ཁང་གི་སྒོ་འགྲམ་བརྒྱུད་ཐེངས་ཤིག་ལ
ཁྱོད་ཀྱིས

གློ་བུར་ངང་གོམ་མཚམས་བཞག་ཡོད་ཚོད་ཡིན
རྒྱང་རིང་རྒྱང་རིང་དེ་དྲན་པའི་མོད་ལ

ཁྱོད་ཀྱིས
རྒྱང་རིང་ལ་ཅི་ཞིག་སྐུར་དགོས་བསམ་ཡོད་ཚོད་ཡིན


༢
ཁྱོད་ཀྱི
གངས་རི་དང་བྱང་ཐང་བརྒལ་མྱོང་པའི་རྐང་པ་ཟུང
རྣོ་ངར་གྱི་རྗན་ཙི་རུ་གྱུར་ནས་འགྲུལ་བཞུད་བྱེད་འགོ་བཙུགས

ཁྱོད་ཀྱིས
མཚན་མོ་རེ་རེ་དུམ་བུ་དུམ་བུར་དྲས་ཏེ
འགྲུལ་བཞུད་ཀྱི་འགྲོ་ལམ་གསར་པའི་རྨང་གཞི་བཏིང

ཁྱོད་ཀྱིས
ཉི་ཟླ་གཉིས་ལ་དྲན་གདུང་གི་ཚོན་རྩི་བགོས་
སླར་ཡང་སྐར་ཚོམས་ཀྱི་ཁ་བས་བསུབ་པར་བྱས
༣
འགྲོ་ལམ་གྱིས་ཁྲིད་ནས། ཁྱེད་རང
གངས་ཐང་གསར་པའི་དོན་སྙིང་གི་མཐིལ་ལ་སླེབས
གྲོང་ཁྱེར་གྱི་ནགས་ཚལ་སྟུག་པོར་།

ཁྱེད་རང་
བརྩེ་དུང་དང་མཉམ་དུ་འཆམ་འཆམ་ལ་ཕེབས
མི་ཚེ་ཡི་དཀྱིལ་འཁོར་གསར་པའི་གཞི་རུ།
ཁྱེད་རང་བསམ་གཞིགས་ཀྱི་སྐྱིལ་མོ་ཀྲུང་ལ་བཞུགས


ཁྱེད་རང་གི་སྨྲ་ལྕེ་ལ་རེ་ཞིག་འཁྱག་པ་ཐེབས་ཙང
བསྡུས་གཟུགས་སུ་གྲུབ་ནས་རྩིགས་ལྡེབས་ལ་འཕོས
༤
ལྷགས་པས་ཁྱོད་ཀྱི་འཕྲིན་ཡིག་ཅིག་ཁྱེར་མ་སོང་ལ
སྤྲིན་པས་ཁྱོད་ལ་གསུང་ལན་ཅིག་བསྣམས་མ་ཕེབས

ཡིག་སྐོགས་ཤིག་ལ་བཅུག་ན་ཆེ་དྲགས་པ་འདྲ་པོ
སེམས་ཀྱི་གཞིས་ཁང་དུ་བཀལ་ན་ཆུང་དྲགས་པ་འདྲ་པོ
___ ཁྱེད་ཀྱི་དྲན་གདུང་།


སྤྱི་ལོ༢༠༡༠ལོའི་སྤྱི་ཟླ༣ པ་ནས་༤ བ་བར་། འདུས་འབྱུང་ཕུན་ཚོགས་ཚེ་རིང་ལགས་དང་མཉམ་དུ་སྒྱུ་རྩལ་འགྲེམ་སྟོན་ཞིག་ལ་ཞུགས་ཤིང་། ཁོང་གི་བསྡུས་གཟུགས་སྒྱུ་རྩལ་གྱི་བརྩམས་ཆོས་དག་མཇལ་ཅིང་འགྲེལ་བཤད་ལ་ཉན་རྗེས་མ་ཡིག་དམ་དུམ་ཐར་ཐོར་ཞིག་དེ་དུས་ནས་ཕབ་ཚར་ན་ཡང་། ཤོག་ངོས་དང་གློག་ཀླད་ནང་ཡོད་པ་དག་ད་བར་དག་སྒྲིག་མ་བྱུང་པར་ལུས། ༡༠༡༠་་༡༡་་༢༤ལ་ལྷོ་ཕྱོགས་སྨོན་འཕེལ་གྱི་གྲོང་སྡེ་རུ་མ་ཡིག་གཏན་འབེབ་ངང་སྦྱར་རོ་། བསྡུས་གཟུགས་སྒྱུ་རྩལ་ཟེར་བ་ནི་རྒྱ་ཡིག་ཏུ་ 拼帖艺术ཟེར་པ་དེ་ཡིན་ཞེས་ཁོང་གི་བསྒྱུར་སྟངས་སོར་འཇོག་ཞུས་ཡོད།

དེང་དུས་བོད་ཀྱི་སྒྱུ་རྩལ།

ཉི་བཀྲག་འགྲེམས་སྟོན།


འདུས་བྱུང་ཕུན་ཚོགས་ཚེ་རིང་པས།




གོ་ལ་ཧྲིལ་པོ་གཅིག་གྱུར་ཅན་དང་སྤྱི་ཚོགས་ཀྱི་གནད་དོན་འདྲ་མིན། འཁྲུག་ཆ་དོད་ལ་འགྲན་རྩོད་ཆེ་བའི་གནས་སྟངས་དང་། ཁོར་ཡུག་དམིགས་བསལ་ཅན་གྱི་ལམ་བུ་དེ་བརྒྱུད་བཞིན་པའི་བོད་ཀྱི་དེང་རབས་སྒྱུ་རྩལ་པ་ཁག་གཅིག་ནས་པེ་ཅིང་གྲོང་ཁྱེར་ནང་ད་ལོའི་ཟླ་བ་དགུ་པའི་ཚེས་བཅུ་ནས་ཟླ་བ་བཅུ་པའི་ཚེས་བཅུ་བར་ཟླ་བ་གཅིག་རིང་༼ཉི་བཀྲག་༽ཅེས་བཏགས་པའི་འགྲེམས་སྟོན་ཞིག་བྱས་པ་རེད།


ཁོ་བོས་འགྲེམས་སྟོན་དེ་བཞིན་ཐོག་མར་དྲྭ་རྒྱ་བརྒྱུད་ནས་ཨེ་ཤི་ཡ་རང་དབང་རླུང་འཕྲིན་ཁང་དང་། དེ་ནས་ཨ་རིའི་རྒྱང་བསྲིང་རླུང་འཕྲིན་ཁང་གི་དྲྭ་བརྙན་བརྒྱུད་མཐོང་བ་དང་། དེ་རྗེས་ཚེ་རིང་འོད་ཟེར་ལགས་ཀྱི་ཟིན་བྲིས་ནས་སྒྱུ་རྩལ་པ་ཚོའི་བརྩམ་བྱ་གང་འཚམས་མིག་ལམ་ལ་སོན་ཐུབ་བྱུང་།


འགྲེམས་སྟོན་དེའི་ནང་མཉམ་ཞུགས་བྱ་མཁན་ཁྱོན་བསྡོམས་སྒྱུ་རྩལ་བ་༥༠ལྷག་ཡོད་པའི་ཁོངས་ནས་བརྒྱ་ཆ་བརྒྱད་ཅུ་ལྷག་བོད་པ་ཡིན་པ་དང་། ཁག་གཅིག་རྒྱ་རིགས་སྒྱུ་རྩལ་པ་ཡིན་ལ། བོད་རིགས་སྒྱུ་རྩལ་བའི་ཁོངས་ནས་ལྷ་སར་གཏན་སྡོད་བྱ་མཁན་དང་། དེ་མིན་བོད་ཀྱི་ས་ཕྱོགས་གཞན་ཁག་ནས་ཡིན་པ་རེད། བོད་རིགས་ནུབ་ཕྱོགས་ནང་བཅའ་སྡོད་བྱ་མཁན་ཁག་གཅིག་ཀྱང་མཉམ་ཞུགས་བྱས་འདུག


འགྲེམས་སྟོན་གྱི་ཇུས་བཀོད་པ་དང་སྒྱུ་རྩལ་ལ་སྐྱོན་ཡོན་སྨྲ་བ་ལི་ཤན་ཐིང་གིས་བཤད་དོན་ལྟར་ན། ཁོང་གིས་དེ་སྔོན་ ༢༠༠༧ ལོའི་བོད་ཀྱི་དེང་དུས་འགྲེམས་སྟོན་དེ་བཞིན་པེ་ཅིང་ནང་ཐོག་མར་མིག་ལ་མངོན་པ་ནས་བཟུང་། ཁོ་རང་ལའང་འགྲེམས་སྟོནཞིག་གི་ཇུས་འགོད་པ་བྱ་སྙམ་པའི་བསམ་བློ་དེ་བྱུང་། འོན་ཀྱང་ཚད་གཞི་མཐོ་པོ་ཞིག་དང་“སོན་ཀྲང་འགྲེམས་སྟོན་ཁང་“འདི་ནི་གཞི་རྒྱ་ཆེ་བའི་ཁང་པ་ཞིག་ཡིན་པར་བརྟེན། འགྲེམས་སྟོན་གྱི་སྟ་གོན་བྱ་རྒྱུར་དུས་ཡུན་ཅུང་ཙམ་གཏོང་དགོས་བྱུང་ཡོད་པ་ལས། དོན་དུ་ལོ་གཉིས་རྗེས་སུ་གཞི་ནས་འགྲེམས་སྟོན་བྱ་ཐུབ་པ་བྱུང་ཟེར།


འགྲེམས་སྟོན་གྱི་སྒོ་ཕྱེས་སྐབས་འགྲེམས་སྟོན་ཁང་དེའི་རྒྱ་སྒོའི་མདུན་དུ་སྒྱུ་རྩལ་པ་རྣམས་མཉམ་འཛོམས་ཐོག བསངས་གསོལ་བྱས་པ་དང་། ལྗགས་སྐྱེམ་ཕུལ་བ། དེ་བཞིན་ཁོང་ཚོའི་སྐེ་ལ་ཁ་བཏགས་གཡོགས་ཡོད་པ་བཅས་མཐོང་རྒྱུ་འདུག


ནང་དོན་ཕུན་སུམ་ཚོགས་ལ་རྒྱུ་ཆ་འདྲ་མིན་བེད་སྤྱད་ཡོད་པའི་ད་ཐེངས་ཀྱི་འགྲེམས་སྟོན་ནི་ད་བར་དེང་དུས་བོད་ཀྱི་སྒྱུ་རྩལ་འགྲེམས་སྟོན་གཞི་རྒྱ་ཆེ་ཤོས་དེ་གྱུར་པ་རེད།


ཁོ་བོས་ནང་དོན་དེ་རྣམས་མཐོང་སྐབས་ཁོ་བོའི་བསམ་པར་ཚོར་བ་སྣ་ཚོགས་ཤིག་སྐྱེས་བྱུང་། ནོར་ཚེ་ལགས་ཀྱིས་བོད་ཡིག་གསལ་བྱེད་སུམ་ཅུ་དེ་བཞིན་ས་སྟེང་ཞལ་ལའི་སྟེང་བསྒྲིགས་ནས་ཤེལ་སྒྲོམ་ནང་རོ་སྒམ་ནང་བླུགས་ཡོད་པ་ལྟ་བུ་དང་། ཤེལ་སྒྲོམ་གཉིས་བར་སྒྲོན་མེ་རེ་སྤར་འདུག གཡག་ཚེ་བརྟན་ལགས་ཀྱིས་སྦི་ཨར་ཤེལ་དམ་ལས་མཆོད་རྟེན་ཆེན་པོ་ཞིག་བཞེངས་ཡོད་པ་མཐོང་རྒྱུ་འདུག དགའ་བདེས་མ་ཎི་ལགས་བསྐོར་ཆེན་པོ་ཁག་བཞེངས་ནས་། དེའི་སྟེང་ཀྲུང་དབྱང་གི་འགོ་ཁྲིད་མི་རབས་བཞི་ཡིས་ཆབ་སྲིད་སློབ་སྟོན་ཁག་བྲིས་བརྐོས་བྱས་ཡོད་པ་རེད།


ཆོས་ཉིད་འཇམ་དཔལ་གྱིས་བོད་ཀྱི་སྲོལ་རྒྱུན་རི་མོ་འབྲི་སྲོལ་གྱི་ལག་རྩལ་གཞི་བཞག་ཐོག ཁོར་ཡུག་གི་གནས་སྟངས་དང་ ༢༠༡༠ ལོར་ཡུལ་ཤུལ་ཁུལ་དུ་ས་གཡོམ་བྱུང་བའི་གནས་དོན་ཁག་མིག་ལམ་དུ་མཐོང་རྒྱུ་ཡོད་པ་མངོན་བྱུང། གོང་དཀར་རྒྱ་མཚོ་ལགས་ཀྱིས་སྦྱར་མའི་བརྩམས་ཆོས་དང་། དེ་བཞིན་བསྟན་འཛིན་རིག་གྲོལ་ལགས་ཀྱིས་ཁོང་གྲུ་ཆུང་ཞིག་ནང་བསྡད་དེ་ལག་ཏུ་༧གོང་ས་མཆོག་གིས་བརྩམས་གནང་བའི་ཕྱག་དཔེ་ཞིག་བསྣམས་ནས། མཐའ་ཡས་པའི་འཇིག་རྟེན་འདིར་འགྲུལ་བཞུད་གནང་ཚུལ་མཚོན་བྱེད་མཐོང་རྒྱུ་འདུག བོད་ཀྱི་བུ་མོ་སྒྱུ་རྩལ་བ་ཁ་ཤས་བོད་ཕྱི་ནང་གང་སར་ཡོད་པའི་ཁོངས་ནས་ད་རེས་པེ་ཅིན་ནང་ཁ་ཤས་ཀྱིས་བརྩམས་ཆོས་ཁ་ཤས་མངོན་རྒྱུ་འདུག
དེ་དང་དེ་འདྲ་བའི་བརྩམ་བྱ་མི་འདྲ་བ་དུ་མ་མཐོང་རྒྱུ་འདུག དེའི་ཁྲོད་ནས་རང་བྱུང་ཁོར་ཡུག་དང་། སྤྱི་ཚོགས་ཀྱི་གནས་ཚུལ་དང་། གནད་དོན་དེ་བཞིན་སྤྱི་ཚོགས་ཤིག་དང་གང་ཟག་སྒེར་གྱི་ལས་དབང་ལ་འབྲེལ་བཤད་བྱེད་པ་སོགས། སྒྱུ་རྩལ་བ་སོ་སོས་རང་ཉིད་ཀྱི་འདོད་ཚུལ་དང་བསམ་པའི་འཆར་ཚུལ་རྣམས་བརྩམ་བྱ་རེ་རེའི་ཐོག་ནས་མངོན་ཐུབ་པར་བྱས་འདུག


ད་ལམ་ཁོ་བོས་དེར་ཚབ་མཚོན་ཙམ་གྱི་སྒྱུ་རྩལ་བ་ཁག་གཅིག་གི་མིང་བྲིས་ཡོད་པ་ལས་སྒྱུ་རྩལ་བ་ཚང་མའི་མིང་དང་བརྩམ་བྱ་ཁག་འབྲི་ཐུབ་ཐབས་བྲལ་ཞིང་། གཅིག་ནས་ངོས་རང་ས་གནས་དེར་སླེབས་མེད་པ་དང་། གཉིས་ནས་གནས་ཚུལ་ཚང་མ་ཇི་མ་ཇི་བཞིན་ཐོས་པ་དང་མཐོང་བའི་བརྒྱུད་ལམ་འདེངས་ངེསཔ་ཞིག་ལག་སོན་མ་ཐུབ་པས་ཡིན།


ངས་རྩོམ་ཐུང་འདི་ནི་རང་ཉིད་ཀྱི་མཐོང་ཚུལ་དང་བསམ་ཚུལ་ཙམ་བྲིས་པ་ལས། སྒྱུ་རྩལ་གྱི་ལོ་རྒྱུས་སྨྲ་བའམ་དེའི་ཐོག་ཞིབ་འཇུག་བྱ་མྱོང་བའི་ཉམས་མྱོང་ཡོད་པ་ལྟ་བུས་བྲིས་པ་ཞིག་མིན། ད་བར་བོད་པ་ཞིག་གི་བོད་ཀྱི་དེང་དུས་རི་མོའི་སྒྱུ་རྩལ་ཐོག་བོད་ཡིག་ནང་རྩོམ་རིག་བྲིས་ཡོད་པ་དཀོན་པོ་འདུག་སྙམ།


པེ་ཅིང་ནང་འགྲེམས་སྟོན་བྱས་པའི་སྒྱུ་རྩལ་གྱི་ནང་དོན་དེ་ལྟ་བུར་རིགས་པའི་གཞུང་ལུགས་ཀྱི་རྒྱབ་བརྟེན་ཡོང་ཆེད་མ་འོངས་པར་བོད་རིགས་ཀྱིས་སོ་སོའི་སྐད་ཡིག་ཐོག་ནས་རྩོམ་ཡིག་གང་མང་འབྲི་མཁན་བྱུང་ཚེ། སྒྱུ་རྩལ་གྱི་བརྩམ་བྱ་ཚད་གཞི་མཐོ་པོ་ཡོད་ཁར་དེ་ལ་རིགས་པའི་གཞུང་ལུགས་ཀྱི་རྒྱབ་བརྟེན་རྩོམ་རིག་སྒྱུ་རྩལ་ཁག་གཅིག་ཡོད་ན། ད་གཟོད་ཆ་ཚང་བའི་སྔོན་ཐོན་གྱི་གཞུང་ལུགས་ཤིག་དང་། རྒྱལ་སྤྱིའི་དེང་དུས་སྒྱུ་རྩལ་གྱི་གདེངས་ཆའི་སྟེང་དཔུང་པ་མཉམ་བཤིབ་ངང་གོམ་པ་སྤོ་ཐུབ་ཀྱི་ཡོད་པར་ཡིད་ཆེས་བྱེད་ཀྱིན་ཡོད།


ལོ་རྒྱུས་དང་འབྲེལ་བའི་བོད་ཀྱི་དེང་དུས་སྒྱུ་རྩལ་གྱི་རྒྱབ་ལྗོངས་ཀྱི་འཕེལ་རིམ་སྐོར་ཅུང་ཟད་འབྲི་ན།ཐང་གའི་བྲིས་རྒྱུན་ཁག་མ་གཏོགས། དེ་མིན་བོད་ཀྱི་དེང་དུས་སྒྱུ་རྩལ་གྱི་ལོ་རྒྱུས་དེ་དུམ་བུ་བཞི་ཙམ་དབྱེ་དགོས་པར་སྙམ་ཞིང་།


དུམ་བུ་དང་པོ་ནི། དུས་རབས་ཉི་ཤུ་པའི་དུས་འགོ་ནས་དུས་རབས་ཉི་ཤུ་པའི་ལོ་རབས་ལྔ་བཅུ་པའི་བར་ཡིན་ལ། དུས་ཚོད་དེའི་ནང་བོད་ཀྱི་མཁས་དབང་དགེ་འདུན་ཆོས་འཕེལ་དང་ཨ་མདོ་བྱམས་པ་ཚེ་བརྟན་སོགས་ཀྱི་བརྩམ་བྱ་རྣམས་ཀྱིས་མཚོན་པར་བྱེད་ཅིང་། བརྩམ་བྱ་དེ་རྣམས་ནི་སྲོལ་རྒྱུན་དང་། འདྲ་བྲིས་དེ་བཞིན་ནུབ་ཕྱོགས་ཀྱི་དངོས་བྲིས་རི་མོའི་འབྲི་སྲོལ་གྱི་ཤན་ཞུགས་ཆེན་པོ་ཡོད་པ་རེད། བརྩམ་བྱའི་ནང་དོན་ནང་སྤྱི་ཚོགས་ཀྱི་གནས་བབས་ཅུང་ཉུང་བ་བྲིས་ཡོད་པ་ལས། སྒྱུ་རྩལ་བ་སོ་སོའི་འདོད་ཚུལ་དང་། ཁོང་རྣམས་ཀྱིས་སྤྱི་ཚོགས་ལ་བཅངས་པའི་ངོས་འཛིན་བྱ་ཐབས་སོགས་མཚོན་མི་ཐུབ། འོན་ཀྱང་ཨ་མདོ་བྱམས་པ་ལགས་ཀྱིས་(༡)ནོར་གླིང་རྟག་བརྟན་མི་འགྱུར་ཕོ་བྲང་གི་ཕོ་བྲང་ཁམས་གསུམ་ཟིལ་གནོན་གྱི་ལྡེབས་རིས་ཀྱི་བརྗོད་བྱར་ ༧རྒྱལ་བ་སྐུ་འཁོར་དང་། སྐབས་དེའི་བཀའ་ཤག་ལྷན་རྒྱས་བྲིས་ཡོད། བྲིས་ཆ་དེས་མཚོན་པའི་སྐབས་དེའི་མཐོ་རིམ་སྤྱི་ཚོགས་མངོན་ཐུབ་ཡོད། དེ་དང་༧རྒྱལ་བའི་ཕྱག་དཔེ་ཁང་ནང་སྙན་གྲགས་ཆེ་བའི་ཨ་མདོ་བྱམས་པ་ལགས་ཀྱིས་ཕྱག་རིས་རྒྱན་དྲུག་མཆོག་གཉིས་མཇལ་རྒྱུ་ཡོད། རི་མོ་དེ་ཡང་༧རྒྱལ་བའི་བཀའ་ཇི་བཞིན་ཨ་མདོ་བྱམས་པ་ལགས་ཀྱིས་དངོས་བྲིས་རི་མོ་གཞིར་བཞག་ཐོག་བྲིས་གནང་བ་ཞིག་ཡིན་པ་ལས་སྒྱུ་རྩལ་བས་རང་འདོད་ཀྱིས་བྲིས་པ་ཞིག་མ་ཡིན།


དུམ་བུ་གཉིས་པ་ནི། རིག་གནས་གསར་བརྗེའི་རླུང་རླབས་ཁྲོད་ནས་ལོ་རབས་བརྒྱད་ཅུའི་བར་ཡིན་ལ། དུས་ཚོད་དེའི་རིང་རི་མོའི་བརྗོད་བྱའི་ནང་། གུང་ཁྲན་རིང་ལུགས་ཀྱི་ཁྱབ་བསྒྲགས་མང་པོ་མཐོང་རྒྱུ་ཡོད། སྐབས་དེ་དུས་འབྲི་རྒྱུན་གྱི་བརྗོད་བྱར་རང་འདོད་ཀྱི་བརྩམ་བྱ་ནི་དེ་བས་མཐོང་དཀའ། འོན་ཀྱང་བོད་ཀྱི་བཙན་བྱོལ་སྤྱི་ཚོགས་ནང་གཏན་སྡོད་བྱེད་པའི་སྒྱུ་རྩལ་བས་དུས་རིམ་དེའི་ནང་སྒྱུ་རྩལ་གྱི་གོ་སྐབས་ཇི་འདྲ་ཞིག་ལ་ངོས་འཛིན་པའི་རྨང་གཞིའི་ཐོག་བརྩམས་ཆོས་གང་ཞིག་བྲིས་ཡོད་མེད་ད་བར་བདག་གི་མིག་ལམ་དུ་ལོངས་སྤྱོད་རྒྱུའི་གོ་སྐབས་མ་བྱུང་བས་གནས་ཚུལ་ཁ་གསལ་ཞིག་ཞུ་མ་ཐུབ།


དུམ་བུ་གསུམ་པ་ནི། དུས་རབས་ཉི་ཤུ་པའི་ལོ་རབས་དགུ་བཅུ་པའི་ནང་ནས་དུས་རབས་ཉེར་གཅིག་པའི་བར་ཡིན་པར་སེམས། དུས་ཚོད་དེའི་ནང་འཚར་ལོང་བྱུང་བའི་སྒྱུ་རྩལ་བའི་བརྩམ་བྱར་ལྟ་སྐབས་ལག་རྩལ་གྱི་རྣམ་པར་འགྱུར་བ་ཕྱིན་ཡོད་ཁར་ནང་དོན་ཁག་ལའང་འགྱུར་བ་ཕྱིན་པ་མངོན་ཐུབ། ནང་དོན་ཁག་ནང་སྒྱུ་རྩལ་པ་རང་ཉིད་ཀྱི་འདོད་ཚུལ་དང་ཕྱིའི་སྤྱི་ཚོགས་ལ་ལྟ་ཚུལ་སོགས་བརྩམ་བྱའི་ནང་གཞི་ནས་མངོན་རྒྱུ་ཡོད། དཔེ་མཚོན་ཙམ་ཞུས་ན། ངོས་རང་ ༡༩༩༥ ལོར་པོ་ཏ་ལའི་མདུན་ངོས་ཀྱི་མི་དམངས་སྒྱུ་རྩལ་ཐང་གི་ནང་བོད་ལྗོངས་སློབ་གྲྭ་ཆེན་མོའི་སྒྱུ་རྩལ་ཚན་ཁག་གི་དགེ་སློབ་ཁག་གཅིག་གིས་འགྲེམས་སྟོན་ཞིག་བྱས་པ་དེར་བལྟ་བར་ཕྱིན་པ་ཡིན། འགྲེམས་སྟོན་དེའི་ནང་གི་བརྩམ་བྱ་ཞིག་ཁོ་བོས་ད་ལྟ་ཡང་གསལ་པོ་དྲན་གྱིན་འདུག་པ་ནི་ Snoker ༼སེ་ཎོག་ཁ༽ ཞིག་གི་སྟེང་ཞི་མི་ནག་པོ་ཁག་གཅིག་རྩེད་མོ་རྩེ་བ་དང་རྩེད་མོ་རྩེད་བྱེད་ཀྱི་སྤོ་ལོ་ནི་མིའི་ཀཱ་ལི་རེད་འདུག


དུམ་བུ་བཞི་པ་ནི། དུས་རབས་འདིའི་ལོ་རབས་འདིའི་ནང་ཡིན། ཆ་འཕྲིན་དང་། ཚན་རྩལ། གོ་ལ་ཧྲིལ་པོ་གཅིག་གྱུར་ཅན་དུ་འགྲོ་བ། སྤྱི་ཚོགས་དང་སྐྱེ་བོ་སྒེར་གྱི་རང་དབང་དང་བསམ་ཚུལ་ལ་གདེངས་འཇོག་བྱ་བའི་ད་ཆའི་འཛམ་གླིང་འདིར་ད་གཟོད་བོད་ཀྱི་དེང་དུས་སྒྱུ་རྩལ་བར་ཡང་དེ་མཚུངས་ཀྱི་འགྱུར་བ་ཆེན་པོ་ཕྱིན་ཡོད། སྤོབས་སེམས་དང་བློ་སྟོབས་ཆེན་པོའི་ངང་ཚོད་ལྟའི་རང་བཞིན་ལྡན་པའི་ཐོག་ནས་བོད་ཕྱི་ནང་གཉིས་སུ་གནས་པའི་སྒྱུ་རྩལ་བ་མང་པོས་ཕྱི་རྐྱེན་དང་ནང་རྐྱེན་སྣ་ཚོགས་འཕྲད་ནའང་། དེ་ལ་གདོང་ལེན་གྱིས་གོམ་པ་ཆེན་པོ་སྤོ་བཞིན་ཡོད།
སྒྱུ་རྩལ་པའི་བརྩམས་ཆོས་ཀྱི་ནང་དོན་ལ་འགྱུར་བ་ཕྱིན་པ་དང་། ལག་རྩལ་བེད་སྤྱོད་གཏོང་ཕྱོགས་ལ་འགྱུར་བ་ཆེན་པོ་ཕྱིན་ཡོད་པ་རེད། ཡང་སྒོས་རྩོམ་ཡིག་ཁག་མང་པོ་དུས་ཚོད་དང་ཕྱོགས་མཐུན་ཞིང་། དུས་བསྟུན་གྱི་རྒྱུ་ཆ་མི་འདྲ་དུ་མ་སྤྱད་ཡོད་པ་རེད།


ལྷ་སར་“དགེ་འདུན་ཆོས་འཕེལ་སྒྱུ་རྩལ་ཚོགས་པ་“གསར་བཙུགས་བྱས་པ་དང་། ཨ་མེ་རི་ཀར་“མེ་ལྕགས་རི་མོའི་ཚོགས་པ་“གསར་བཙུགས། ལོན་ཊོན་དུ་“ཇ་མངར་མོའི་སྒྱུ་རྩལ་དར་སྤེལ་ཁང་“སོགས་སྤྱི་སྒེར་མང་པོས་དོ་འཁུར་བྱས་པ་བརྒྱུད་བོད་ཕྱི་ནང་གཉིས་ཀྱི་སྒྱུ་རྩལ་བའི་བར་འབྲེལ་ལམ་དང་ཕན་ཚུན་བརྗེ་རེས་ཀྱི་བརྒྱུད་ལམ་ཞིག་སྒྲུབ་ཐུབ་ཡོད། ལྷག་པར་དུ་ད་ཆ་ངོ་དེབ་དང་(Facebook) བོད་ནང་ཀ་ཀ་༢༡ ཡིས་ཟིན་བྲིས་དྲྭ་རྒྱ་ལྟ་བུས་མཚོན་པས་བརྒྱུད་ལམ་སྣ་ཚོགས་ནས་སྒྱུ་རྩལ་པའི་རྣམ་དཔྱོད་གཏོན་པ་དང་ཕན་ཚུན་ཤན་ཤུག་གི་ནུས་ཐོན་བཞིན་ཡོད།


སྒྱུ་རྩལ་གྱིས་མི་རིགས་ཤིག་གི་ཤེས་རིག་དཔལ་ཡོན་གྱི་ཚད་གཞི་གང་ཙམ་ལ་སླེབས་ཐུབ་ཡོད་མེད་དང་། སྐྱེ་བོ་གང་ཞིག་གི་རང་ཉིད་འཚོ་སྡོད་ཀྱི་ཁོར་ཡུག་ལ་འཆར་བའི་བསམ་པའི་འགུལ་ཤུགས་ཤིག་ངོས་འཛིན་བྱེད་པ་ཡིན། དེང་དུས་སྒྱུ་རྩལ་གྱི་ལམ་ནས་རང་ཉིད་ཀྱི་རང་དབང་དང་། ཐོབ་ཐང་། རང་ཉིད་འཚོ་སྡོད་བྱ་སའི་ཁོར་ཡུག་གི་གནད་དོན་སོགས་ཕྱི་རོལ་ཡུལ་དང་ཐག་ཇེ་ཉེ་ཡོང་བར་བྱེད་པའི་བགྲོ་གླེང་གི་ལྡིང་ཆ་ཞིག་ཀྱང་ཡིན་པ་རེད།


རྩ་བའི་ཆར་ད་ཆ་བོད་ཀྱི་དེང་དུས་སྒྱུ་རྩལ་པ་དང་། ཁོང་ཚོའི་བརྩམས་ཆོས་ཁག་ལ་ཅུང་ཟད་དཀའ་ངལ་འཕྲད་བཞིན་ཡོད། དཀའ་ངལ་དེ་ནི་ལོང་སུ་སྤྱོད་མཁན་གྱི་སྤྱི་ཚོགས་ཤིག་དང་སྒྱུ་རྩལ་པ་རང་ཉིད་ཀྱི་བརྩམ་བྱའི་གནས་བབས། དེ་བཞིན་རྒྱལ་སྤྱིའི་སྤྱི་ཚོགས་ཀྱི་ནང་ལྡིང་ཆ་ཡོད་མེད་སོགས་ཡིན།


བོད་ཕྱི་ནང་གི་སྤྱི་ཚོགས་ནང་རི་མོའི་སྒྱུ་རྩལ་བར་གདེངས་འཇོགས་བྱེད་པའི་ཐབས་ལམ་ཞན་པོ་རེད། དེ་ན་འགྲེམས་སྟོན་བྱ་ས་ཉུང་བ་དང་། འགྲེམས་སྟོན་བྱས་ནའང་བོད་མིས་འགྲེམས་སྟོན་ལྟ་བར་ཡོང་མཁན་ཉུང་ཞིང་། བོད་མི་ཚོར་དེ་འདྲའི་གོམས་སྲོལ་ཞིག་ད་བར་ཆགས་ཐུབ་མེད་པ་རེད། སྤྱི་ཚོགས་ནང་ནུས་པ་དང་། སྤྱི་ཚོགས་ཁ་ལོ་སྒྱུར་ཐུབ་མཁན་གྱི་མི་སྣའི་ནང་། བོད་ཀྱི་དེང་དུས་རི་མོའི་སྒྱུ་རྩལ་ལ་དོ་སྣང་དང་། གདེངས་འཇོགས་བྱ་མཁན་ཉུང་ལ། ཤེས་ཡོན་ཅན་དང་། ཆབ་སྲིད་མི་སྣ། བླ་མ་སྐྱེས་ཆེན་དམ་པ་དང་། བོད་མི་དཀྱུས་མའི་ནང་ལ་དེང་དུས་བོད་ཀྱི་སྒྱུ་རྩལ་ལ་དོ་སྣང་ཞན་པ་དང་། རྩོམ་ཡིག་ཁག་ལ་དོ་སྣང་གིས་སྐྱོན་ཡོན་གྱི་བལྟ་ཚུལ་བཤད་མཁན་མེད་པ་དང་། ལྷག་པར་དུ་ཆེད་ལས་ཀྱི་སྐྱོན་ཡོན་འབྲི་མཁན་དེ་བས་ཀྱང་ནས་མེད་པ་རེད།


རི་མོའི་ལོ་རྒྱུས་སྨྲ་བ་བོད་རིགས་ནང་མེད་པ་དང་། བོད་སྐད་ཡིག་ཐོག་དེང་དུས་སྒྱུ་རྩལ་གྱི་བསྟན་བཅོས་དང་རྩོམ་འབྲི་བྱ་མཁན་མེད་པ། དེང་དུས་བོད་ཀྱི་སྒྱུ་རྩལ་འགྲེལ་བཤད་རྒྱབ་སྐབས་གཅིག་གྱུར་གྱི་ཐ་སྙད་མི་འདེངས་པ་དང་། བརྡ་ཆད་ཀྱི་ཐ་སྙད་ཚད་ལྡན་མེད་པ། སྒྱུ་རྩལ་བ་རང་ངོས་ནས་ཚོད་ལྟའི་རང་བཞིན་གྱི་ཐབས་ལམ་འགྲིམས་བཞིན་པའི་གནས་བབས་མང་བ། རྒྱལ་སྤྱིའི་སྟེང་ད་དུང་ཡང་བོད་ཀྱི་སྒྱུ་རྩལ་གྱི་ཐོག་ངོས་འཛིན་བྱ་མཁན་མང་བ་ནི་ཐང་ག་དང་ཆོས་ལུགས་ཁོ་ནས་དབང་བསྒྱུར་བའི་རིག་གཞུང་ལ་ངོས་འཛིན་པ་སོགས་ཡིན་ངེས།
འོན་ཀྱང་ངའི་བལྟ་ཚུལ་ལ་བོད་ཀྱི་དེང་དུས་སྒྱུ་རྩལ་བས་ཕྱོགས་ཡོངས་ནས་ལྟ་བ་སྲ་བརྟན་དང་། བོད་ཀྱི་ཞག་ཚི་ཡོད་པའི་“དེ་རིང་གི་བོད་ཀྱི་སྒྱུ་རྩལ་“ཞེས་པ་ཞིག་འཛམ་གླིང་གི་ལྡིང་ཆའི་སྟེང་ཚ་ཚ་ཧུར་ཧུར་གྱིས་མདུན་དུ་བསྐྱོད་པའི་ཕྱོགས་སུ་སྙེག་བཞིན་འདུག།


༡ ཨ་མདོ་བྱམས་པ་ལགས་ལྷན་དུ་ ༡༩༩༧ ལོར་བཅར་འདྲི་བྱས་པ་ཞིག་ལས་ལུང་དྲངས་པ་ནི།


དཔྱད་གཞིའི་བརྒྱུད་ལམ་ཁག


ཚེ་རིང་འོད་ཟེར་གྱི་དྲྭ་རྒྱ


མེ་ལྕགས་རི་མོའི་ཚོགས་པ།


ཇ་མངར་མོའི་དྲྭ་རྒྱ།


ཨེ་ཤི་ཡ་རང་དབང་རླུང་འཕྲིན་ཁང་།


ལོན་ཊོན་བོད་གནས་ཁྱབ་སྤེལ་ཁང་།


རི་མཐོ་ས་གཙང་།