འཁེར་རྐྱང་གི་ལོ་ཟླའི་ནང་། འཁེར་རྐྱང་གི་འཚོ་བར་རོལ།
འཁེར་རྐྱང་གི་མི་ཚེའི་ནང་། འཁེར་རྐྱང་གི་མི་རྟག་་བསམ།
འཁེར་རྐྱང་གི་གཞན་ཡུལ་དུ། འཁེར་རྐྱང་གི་ཟས་ལ་སྤྱད།
འཁེར་རྐྱང་གི་གདུང་བའི་ཁྲོད། འཁེར་རྐྱང་གི་མཆི་མ་བཏང་།
དྲན་བྱུང་།
མཛེས་པའི་གངས་ལྗོངས། དགའ་པའི་ཕ་ཡུལ། སྐྱིད་པའི་ཡུལ་གྲུ།
ཕ་མེས་ཀྱི་ཞིང་ས། ཆུང་འདྲིས་འགྲོགས་ས། གཅེས་པའི་ཕ་ས།
ཅི་ཞིག་གི་སླད་དུ། གང་ཞིག་ལ་བརྩོན།
ཅི་ཞིག་གིས་སྐུལ་བས། གང་ཞིག་ལ་བསམ།
སྐྱོ་གདུང་གི་མཆི་མའི་ཁྲོད། སེམས་སྡུག་གི་གླུ་ཆུང་རེ་བླངས།
ཞེ་འདོད་ཀྱི་ཞིང་ས་རུ། ཤུགས་བྱུང་གི་འབད་པར་བརྩོན།
དེ་དུས།
མགྲིན་དབྱངས་ཅི་བླངས་རུང་། ཕ་ཡུལ་དྲན་པའི་དབྱངས།
བསམས་གཞིགས་ཅིར་མནོ་རུང་། ཕ་ཡུལ་ཁོ་ནར་དམིགས།
དེ་དུས།
དབང་མེད་རྒྱང་རིང་ལ་བལྟ་བཞིན།
བཅོས་མིན་གྱིས་རང་ཉིད་ལ་ཁངས་ར་རེ་བྱ་བཞིན།
དབུགས་རིང་རེ་འབྱིན།
རྒྱང་རིང་གི་ཕ་ས། དྲན་སྡུང་གི་གཞི་མ།
མི་ཚེ་ཡི་བརྟེན་གཞི། སེམས་ཤུགས་ཀྱི་དཔངས་རྟགས།
གངས་ལྗོངས། ཁྱེད་ནི་བདག་གི་རེ་བའི་རྐང་ལག་དང་།
མ་འོངས་པའི་མདུན་པ། བླ་སྲོག་གི་བྱེད་པོ།
ཁྱེད་ནི་བདག་གི་ཡོད་ཚད་ཀྱི་བདག་པོ་ཡིན།།
Keine Kommentare:
Kommentar veröffentlichen